മസ്കത്ത്: റമദാന്‍ മാസത്തില്‍ റെസിഡന്‍ഷ്യല്‍ വരിക്കാരുടെ ജല സേവനങ്ങള്‍ വിച്ഛേദിക്കരുതെന്ന് പുതിയ നയം പുറപ്പെടുവിച്ച്‌ പബ്ലിക് സര്‍വിസസ് റെഗുലേഷന്‍ അതോറിറ്റി (എ.പി.എസ്.ആര്‍) ഡയറക്ടര്‍ ബോര്‍ഡ് ചെയര്‍മാന്‍ സലിം ബിന്‍ നാസര്‍ അല്‍ ഔഫി പറഞ്ഞു.
കണക്ഷന്‍ വിച്ഛേദിക്കാന്‍ കുറഞ്ഞത് പത്തു ദിവസം മുമ്ബെങ്കിലും നോട്ടീസ് നല്‍കണം. ബില്ലുകള്‍ അടക്കാതിരിക്കുക, വൈകി ബില്‍ അടക്കുക, കണക്ഷന്‍ അഭ്യര്‍ഥനയില്‍ സൂചിപ്പിക്കാത്ത മറ്റ് ആവശ്യങ്ങള്‍ക്കായി ജലം ഉപയോഗിക്കുക, മറ്റ് വരിക്കാരെ പ്രതികൂലമായി ബാധിക്കുന്ന തരത്തില്‍ വെള്ളം ദുരുപയോഗം ചെയ്യുക, അംഗീകൃത മാനദണ്ഡങ്ങള്‍ പാലിക്കാതെയുള്ള കണക്ഷന്‍ എന്നിങ്ങനെയുള്ള അഞ്ച് സാഹചര്യങ്ങളില്‍ ജലവിതരണം വിച്ഛേദിക്കാം.
കുടിശ്ശികയുടെ നാലിലൊന്നോ പകുതിയോ അടക്കുക, അല്ലെങ്കില്‍ ഒരു നിശ്ചിത കാലയളവിനുള്ളില്‍ കുടിശ്ശിക ഗഡുക്കളായി തീര്‍ക്കാന്‍ സമ്മതിക്കുക തുടങ്ങിയ സാഹചര്യങ്ങളില്‍ വീണ്ടും കണക്ഷന്‍ നല്‍കാം. പുതിയ തീരുമാനമനുസരിച്ച്‌, സ്മാര്ട്ട് മീറ്ററുകളുള്ള റസിഡന്‍ഷ്യല്‍ വരിക്കാരുടെ സേവനങ്ങള്‍ പുനഃസ്ഥാപിക്കുന്നത് മൂന്ന് മണിക്കൂറിനുള്ളിലും സ്മാര്ട്ട് മീറ്ററുകള്‍ ഇല്ലാത്ത വരിക്കാരുടേത് ആറ് മണിക്കൂറിനുള്ളിലും നടത്തണമെന്നും വ്യവസ്ഥയില്‍ പറയുന്നു.
വാരാന്ത്യങ്ങള്‍ക്കും ഔദ്യോഗിക അവധികള്‍ക്കും മുമ്ബുള്ള അവസാന പ്രവൃത്തി ദിവസങ്ങളിലും കുടിവെള്ള കണക്ഷന്‍ വിച്ഛേദിക്കരുതെന്നും വ്യവസ്ഥയുണ്ട്.